قصيدة زجلية تحت عنوان:سَوَّلْنَاهُمْ

سَوَّلْنَاهُمْ

عْلاَشْ مَكَنْخَدْمُوشْ فَاللِّي قْرِينَا

و عْلاَشْ مَقْرِينَاشْ اللِّي بْغِينَا

جَاوْبُونَا بِبَسَاطَة وقَالُو لِينَا

حْنَا مُتَعَدِّدِي المَوَاهِبْ نْخَدْمُو اللِّي لْقِينَا

أَمَّا َقَضِيَّةْ لَقْرَيَا فَكَانُو غِيرْ على الشَّمْس و الشْتَا مْخَبْيِّينَا

سَوَّلْنَاهُمْ

عْلاَشْ كَنْتْخَلّْصُو شْوِيَّة و كَنْخَدْمُو بَزَّافْ

و كَيْتْخَلْصُو بَزَّافْ اللِّي كَيْخَدْمُو سَاعَاتْ خْفَافْ

جَاوْبُو وقَالُو بِاسْتِخْفَافْ

حِيتْ حْنَا حمِيرْ الطَّاحُونَة خَدَّامِينْ بَعْرَقْ لَكْتَافْ

أَمَّا هُومَا مَصَارِيفْهُمْ كْتَارْ فِيلاَّ،طُومُوبِيلْ و سِيجَارْ لِتَّكْيَافْ

سَوَّلْنَاهُمْ

عْلاَشْ مَلِّي كَنَبْغِيو شِي وَتِيقَة خَاصْنَا نَعْطِيوْ الرَّشْوَة

يَا إِمَّا فْلُوسْ يَا إِمَّا نْخَلّْصُو قَهْوَة

جَاوْبُو وقَالُو بِكُلْ نَخْوَة

حِيتْ حْنَا رَمْزْ الضَّعْفْ و هُومَا اللِّي مَاسْكِينْ زْمَامْ القُوَّة

نَسْتَغَلُّوكُمْ مَحَدْكُمْ بَاقِي مَاوْعِيتُو أُو وَاخْدَاكْمْ السَّهْوَة

سَوَّلْنَاهُمْ

عْلاَشْ مَكَتْخَلِّيوْنَاشْ نْعَبّْرُو على رَئيْنَا السِّيَاسِي

تَاخْدُوهْ بِعَينْ الإعْتِبَارْ و تَحْتَرْمُوهْ و هَدَا هُوَ الأَسَاسِي

جَاوْبُو وقَالُو بكُلْ مَايَجْرَحْ إحْسَاسْ أَيْ مُوَاطِنْ و إحْسَاسِي

حِيتْ حْنَا بِخَوْفْنَا و تَخَوُّفْنَا حَطَّمْنَا الرَّقَمْ القِيَاسِي

أمَّا رَأَيْكُمْ مَكَيْهَمْنَاشْ مَدَامْنَا جَالْسِينْ علَى نَفْسْ الكَرَاسِي

سَوَّلْنَاهُمْ

عْلاَشْ مُصِرِّينْ تْنَوّْضُو بِنَّا حَرْبْ أَهْلِيَّة

بَالفَرقْ اللِّي دَايْرِينُو بِينْ شْلُوحْ،فَاسِيِّينْ،عْرُبِيِّينْ،و أَقَالِيمْ صَحْرَاوِيَّة

جَاوْبُو وقَالُو بِطَرِيقَة احْتِقَارِيَّة

لاَزَمْهُمْ يْشَغْلُونَا بْشِي قَضِيَّة

حَتَّى يْقَدْرُو يْهَرْبُو فْلُوسْ الشَّعْبْ و المِيزَانِيَّة

سَوَّلْنَاهُمْ لَكِنْ مَابْقَاوْ جَاوْبُونَا

وقَالُو اللِّي عْرَفْنَاهْ بَرَاكَة عْلِينَا

خديجة لطيف